كنت فرحانه

كان نفسى أكتبلكم و أنا فى حاله الفرح الغير مبررة الغير مسبوقه اللى كنت فيها بس للأسف راحت قبل ما اللحق أحكى عنها بس ما فيش مانع أنى أحكيلكم عنها حتى لو حسها أنها تقريبا أنتهت.

الحاله الظريفه دى بدأت تقريبا من تلات أيام لما خرجت مع واحده من صحابى فى خروجه ماكنتش مخططلها ،المهم كنا نزلين نشترى حاجات و أول ما ننزل من الميكروبان الاقى الراجل اللى بيبيع كتب جنب المحطه قلت أبص يمكن الللاقى حاجه من الكتب اللى بدور عليها "نون" لسحر الموجى " و جوع " لمحمد البساطى. الدنيا كانت بليل و أنا بتفرج على كتب مرميه على الارض وسط الجرايد لاقيت كتاب " بيت من سكر " لسوزان عليوان أنا كنت قريتلها حاجات على الموقع بتعاها و عجبنى أوى أسلوبها .الديوان شكله حلو و سعره حلو"2ج" و كنت فرحانه أنى لاقيته و بالصدفه أبص لفوق على شويه كتب مرصوصه على رف خشب الالقى أيه ؟ الاقى روايه جوع ماصدقتش عينيا أشتريت نسختين واحد ليا و التانيه لصحبتى اللى كانت كلمتنى عن الروايه كنت هطير من الفرحه.

جه معاد المرواح و الصراحه كنت خايفه على الحاله لاتروح لما أروح لحسن حد فى البيت يضايقنى بأى حاجه .المهم ربنا سترها و محصلش حاجه ليلتها عملتلهم عشا من نفسى و كله تمام. و بليل و أنا يتفرج على بعض البلوجات الشقيقة لاقيت فى مدونه "أخر" لينك لأغانى وجيه عزيز اللى كنت بدورله على أغانىمصدقتش نفسى برضه و حسيت أنى عديت حتى" كلود نمبير 9" اليوم اللى بعده صحيت و نفس الحاله موجوده بل و بتزيد و أفتح الكمبيوتر الاقى نونا على الشات كان الكمبيوتر بتعها عيان و الحمد لله خف كانت وحشانى خالص ده بقى خلى مخى شاط من الفرحه فعلا.

اليوم التالت اللى هو تقريبا أمبارح قابلت على الشات حدوته كنا تانى مرة نتكلم و ساعدتى أحط الميوز بوكس اللى من ساعه ما عملت البلوج و أنا نفسى أحطه، ساعدتى أختار أغنيه بحبها سعتها حسيت أنى مش ممكن أكون أسعد من كده و حتى لو الحاله راحت مكنش هندم . لا ده كمان خرجت مع واحده صحبتى روحنا عند واحد تانيه و عملنا بارتى بناتى كان نفسى فيه من زمان و بليل ما جليش نوم فعملت ساندوتشين بطاطس بالكاتشب و أعقدت أقرى فى رواية جوع لقيتها ظريف بس أضايقيت لان الكتابه على الغلاف من برده حرقت كل القصه بس المهم نمت بعد أدان الفجر و أنا بتمنى ان الحاله دى ما تمشيش بس صحيت النهارده و انا حسه أنها ناويه تسبنى مش عارف بس أنا همسك فيها ، هغريها بكوبايه كاكاو يمكن تعقد شويه تانين.