أكره جيرى و باجز و تويتى

أحب أوضح أنى بحب الكرتون و معدنيش مشكله أنى أتفرج عليه بس مشكلتى مع السابق ذكرهم هى مشكله أكثر عمقا

أولا: خلينا نبدأ بجيرى ذلك الفار المفعوص و الذى يكيد لتوم الغلبان الهزائم اللى بيضيقنى فعلا أن توم بيعمل كل فكره و فكره و مع ذلك و لأن تقريبا المخرج بيجب الفيران يقوم السيد جيرى بتخريبها أحيانا حتى بطرق لا منطقيه بصراحه أنا شايفه إن من حق تومى ياكل جيرى، طبيعى أن القط يأكل الفار خاصه لما يعمل اللى عليه و يحط خطه ممتازة

ثانيا: بالنسبه للحج باجز فهو أولا ثقيل الدم جدا بالجزره العبيطه بتاعته، بعدين بحسه أليط أوى فاكره نفسم محدش زيه نفسى لراجل الغلبان يصطاده و يخلص عالمى من رخامته.

ثالثا: السيد تويتى هذا العصفور الألدغ و الذى يبدوأنه أيضا على معرفه بالمخرج الذى ينجيه من قبضه الغلبان سلفستير على الدوام

ملحوظه: أستسنى من هذا الكرهه السيد كيوتى و رود رنر ربما لأنهم قرايبى من بعيد