يا ناس أنا مهيسه ، و بتكلم بالفلسفه

من كام يوم كنت قاعدة فى قاعدة صفا مع نفسى و فجأة الفكرة خطرت على بالى.. عمرك فكرت أد أيه احنا شبه أزايز المياه.
الروح هى الميه و الجسد هو الأزازة.. كل واحد فيهم محتاج التانى. من غير الأزازه الميه تتكب و تشربها الأرض و من غير ميه فى الأزازه، الأزازه ملهاش أى معنى و هنرميه فى أول باسكيت.
و زى ما أهم حاجه فى الازازه هو الغطا . أهم حاجة فينا هو العقل، و زى أزايز الميه ساعات ناس بتقرب منا تاخد شفته و تمشى و تسبينا ناقصين حته و أحيانا ناس تشرب حته و يعجبها الطعم فتخدنا معاها ف كل حته و لما تخلص الأزازه يملوها تانى و اجيانا مع الوقت ينسوا يملونا أو يلاقوا أزازيز تانيه طعم أحلى أو بس مختلف .. فيسبونا على الرف أو فى التلاجه لحد محد تانى يلاقينا و يرجع يملانا تانى.و احيانا ناس متشربش منك ولا نقطه بس تزرع فيك ورده و تسبها و تمشى.و ساعات نوقع و تنجب الميه أو نشرخ بس دايما ممكن نتملى من أول و جديد أو نصلح أى نعم مش بنرجع زى الأول بس كونك هاترجع أقوى أو أضعف ده أختيارك

:و الازايز نوعين

نوع مركون على الرف فى السوبر ماركت محدش بيشريه فيضل مليان زى ما هو سليم حتى البلاستيك على الغطاء زى ما هو بس مع الوقت هيخلص تاريخ صلاحيته و يترمى من غير ما حد يلمسه.. يجى و يمشى من غير ما حد يلاحظ وجوده

و نوع تانى ناس كتير بتشتريه تاخد بق و تمشى أو تاخده و تحطه فى التلاجه أو تشليوه معاه فكل حته.. أى نعم ساعات كتير بتبقى ناقصه منك حته بس بتاقبل ناس كتير و بتبقى جزء منهم و هم بيبقوا جزء منك

فلو عشت ناقصه منك شويه ميه أو محطوط فى التلاجه لحد متقابلك ايد جديده أو بس على الرف تأكد أن ده أحسن من أنك تعيش كل حياتك فى السوبر ماركت

و لما تزهق من كونك دايما ناقص حته و تكتر البصمات على جدرانك الحل بسيط جدا أفتح الغطا ، غمض عينيك و أقف تحت المطر.. و لو الدنيا صيف أقف تحت الحنفيه