CLICK HERE FOR THOUSANDS OF FREE BLOGGER TEMPLATES »

Saturday, February 21, 2009

ممكن


..لو صحيت بكرة و لاقيت أن نبتت لي أجنحة بيضا بورد بمبي و فرشات زرقاء، غالبا هتخض

و بعد جلسه يوجا تأمليه و تمارين تنفس لتهدئه الدوشه اللى في دماغي ،هفتكر إن ده كان حلمي اللي كتبت عنه كتير و هلاقى ان حقيقة يكون لى أجنحة في الواقع شيء مفيد جدا

من النهارده مش هشيل هم الصحيان بدرى و هاقضى وقت أطول في النوم و اخلص الأحلام المتأخرة عاليا، سكه المرواح مش هتبقى طويلة و ممله و أهم من ده كله مش هتزنق في الموصلات تانى

مش بس كده، دا أحلام تانيه كتير هتبقى ممكنه مثلا، القعده على النيل الساعه تلاته بليل مع كوبايه كاكاو و شمعه بنفسجى.كان نفسى اعمل "كده من زمان بس كنت خايفه لكن .. "لا خوف بعد اليوم

لما أتخنق من أرواح ضلمه مبتفهمش حاجه فى اى حاجه، هاخد نفسى و اروح طنطا اعقد مع تيسير على السحابة اللى جنب بيتهم نأكل ايس كريم فى عز الشتا فندفا و نحكى من غير كلام طول الليل و ارجع بتنا قبل ما حد ياخد باله
و لما صوت الدوشه يعلى هاوح أسيوط اعقد مع ريهام فى شمس العصر زى زمان هاوريها اخر انجازاتي الشعرية "اذا كان ممكن تتسمى كده" هنسمع منير و ساعاتها هنحلم بمدينة كل ولادها سمر و عينهم مليانه دافا زى منير تمام.

اكيد طبعا ماما مش عيجبها شكل اجنحتى و هتقول انها مش ماشيه مع لون الطرحه و الفرشات شكلها مش حلو و تقولى شيلهم، فأحرك شفايفى بكلمه تشبه– خد بالك من تشبه- حاضر واغمض عينى و اعلى صوت بالغنا


بالنسبه لبابا فغالبا مش هياخد باله إلا بعد أسبوع أو حاجه ساعتها هيقول "دى اخره الاغانى و الأفلام الاجنبى اللى بتسمعيها و الفكر الغربى اللى بوظ دماغك،شوفى حصلك ايه؟"، و فى الحاله دى هيبقى نفسى ارد و ادافع لكن هكتفى بالضحك في سرى المرة الجايه لما اعدى من قدامه هخبيها

و لما اروح اوريهم لخويا التؤام اللى مفروض هيفهم و يفرحلى هيقول إن شكلها عبيط و الورد فلاحى و انى غريبه وكلام كتير عن فلسفة الحياة كما يراها فهعمل نفسى بسمعة و مقتنعة لحد ما ينهى التعليق ب "روحى ذاكري أحسن" فاروح و مجيش تانى

اما أختى الصغيرة فاكيد هيعجبوها اوى "بتعرفى تطيرى بيهم "هتسئل "طب ممكن تدهملى شويه"و تكمل " طب جبتيهم منين"؟

و أنا مش هارد غالبا لانى مش عارفه الاجابه و اكتفى ب "لما تكبري تفهمى "، قال يعنى انا الكبيرة فهمت حاجه؟

!يمكن لسه ما كبرتش كفايه؟

أما كيكى قطتى حبيبتى اكيد هتحبهم هتقرب بالراحه تشم الورد و تحاول تمسك الفرشات


طبيعى ان صحابى فى الكليه اما هيعملوا نفسهم مش واخدين بالهم و ينموا عاليا لما امشى، او هيبعدوا لحسن يكون ده مرض معدى ولا حاجه
و اعز صحباتى هتقرر إن كده كتير أوى و إن إحنا ما ينفعش نبقى صحاب بعد كده لأننا مختلفين! ، بعدين الناس تقول عاليها ايه لما يشوفها ماشيه مع واحده زى!ساعتها هارسم جمب الورد و الفراش قلب صغير مشروخ و امشى من غير ما ابص ورايا.

لحد ما اصحى بكرة و الاقى ان عندى اجنحة بورد بمبى و فرشات زرقا هاروح أتدرب على الطيران بأجنحة ورق و قلب بنفسجى

9 comments:

Anonymous said...

جميل ومنعش قوي حلمك
وأشركتيني فيه
بس صدقيني الموضوع مش خيالي قوي كدة
بدليل انك عندك فعلا
مفيش حد يقدر يوصل لسحر الموجي أو أحلام مستغانمي من غير أجنحة
المشكلة في القفص

أرواح ضلمة
يابنت الذينة اية الجملة دي

r said...

غجريه
فينك من زمان
على العموم اما مطمنه عليكى ما دام معاكى الجناحين بتوعك وهتعرفى تطيرى بيهم فى الوقت المناسب
وكفايه النيل اللى قدامك دا سحر وطيران وعالم تانى خالص فى حد ذاته
اما عن صحبتك واعزهم اذا كانت مش بتفهمك من دلوقتى وانتى مختلفه يبقى عمرها ما تفهمك
دا عن تجربه

horas said...

كلام حقيقي بجد
وبس

سحساوي said...

كويس انك لسه عندك أجنحة
انا مستني البوست اللي جي و لا اللي بعده لما تكتشفي ان ما فيش اجنحة و لا حاجة و الأحلام الكارتون اللي بتتفرجي عليها هتقلب كوابيس
ممكن ما تلاقيش رجلين و لا إيد
مش نظرة سوداء لكن الواقع أصعب مما تتخيلي
على العموم البوست جميل جدا و عجبني انك لا تبالين بمن حولك عندما تريدين الطيران ن هيظل باباكي هوه بباكي و ماماكي هيه مامكي و اخاكي هو...............
يحطي للناس أجنة يا اما تشيليها
يا اما نتقالبل انا وانت في مستشفى المجانين
أسكر الصدف الجميلة اللي وصلتني للبوست الجميل ده
سحساوي
صاحب أجنحة سا بقا و الآن معاق ذهنيا
ههههههههههه

Yasmine Adel Fouad said...

آية


حلوة أوى ، الموود عاجبنى بس محتاجه شوية تصحيح لأخطاء إملائية كتير و شوية تظبيط عشان ترشق جوه القلب


وحشانى يا قطة

Anonymous said...

يااااه لو كان عندي جناحات من اي لون.....بس تفتكري الارواح الضلمة هتسبني في حالي؟!اصل انتي عارفة بنادق الصيد متوفرة في كل حتة!

Anonymous said...

يااااه لو كان عندي جناحات من اي لون.....بس تفتكري الارواح الضلمة هتسبني في حالي؟!اصل انتي عارفة بنادق الصيد متوفرة في كل حتة!وحشاني حنان

Razi Soliman said...

كنت بسمع اغنية وحياتى خليكى لعمرو مع كلامك فكنت حاسس بشعور غريب

احلام جميلة وكلنا بتمناها
بس الواحد من كتر الخيال بقى يخبط فى حيطة الواقع كتير لحد ماتخرشمت

اسلوبك جميل
تحياتى

Anonymous said...

:)