حتته يوم

النهارده كان حتته يوم، النهارده روحت المستشفى علشان أتدرب ( أنا أصلا رايحه سنه تلاته) يعنى مش هاروح المستشفى قبل كمان سنه بس قولت أروح أتعلم أى حاجه أدى حقنه أى حاجه علشان أحس أنى بفهم فى الطب.الحقيقه أن واحده صحبتى اللى شجعتنى
المهم روحنا المستشفى و دخلنا أستقبال الباطنه أول ما بصنا فى الأوده لقينا دكتورة و دكتور، سيبك من الدكتورة و خوش زووم على الدكتور واقع الأمر كان أمور و أنا قدام الامامير بفقد قدرتى على الكلام أو بمعنى أصح مقدرش أبدء على طول بحتاج شوية وقت المهم صحبتى دخلت و دخلت وراها و قلنلاهم أننا طلبه طب و عايزين نتعلم حقن و حاجات كده، على غير ما كنت متوقعه ردت بكل بساطه أتفضلوا أقعدوا.
و بعد ما يقل عن دقائق بدأت الحلات تهل خلال وجودنا من 1 - 7 جيه ما يقرب من 13حاله كان في منها 2 زايده و الباقى قلب و كان فى حاله قولون و حاله " أحم" مثانة . معظم الوقت الناس كانت بتتخم فينا وتفكرنا أحنا الدكتارة رغم وجود النائب (أكتشفنا بعد كده أنه نائب مش مجرد دكتور) و الدكتورة الأمتياز تقريبا لاننا كنا أعقدين فى مواجهه الباب
بعد شويه الدكتورة مشت (لا مأعدناش مع النائب هو أصلا ما أعدش أكتر من تلات دقايق على بعض) بعدين احنا جايين نتعلم

المهم جيه دكتور امتياز تانى كان عسول أوى( بس ما تفهموش غلط) و شرح لنا حاجات كثير و خلانا نقيس ضغط لبعض المرضى ، بعد شويه جت بنت بتشتكى من وجع فى الجانب الشمال من صدرها و لما طلب الدكتورأ نه يكشف عليها أتكسفت فكشفت عليها صحبتى "مش متأكده هى كانت عارفه أن أحنا اندر و لا لأ، المهم عملولها رسم قلب "خاصه أن نايب كان نايب قلب فكان بيشوف فى كل حاله حاله قلب".المهم فى الأخر طلعت واخده برد فى العضلات ..بعدين الدكتور العسول ودانا عند رئيسه الممرضات علشان تعلمنا ندى حقن، فكان علينا نستنا أول ضحية علشان نتعلم فيها، بعد شويه جت الضحيه برجليها كانت هاتاخد حقنه وريد و احنا عمرنا ما أدينا حقنه وريد قبل كده ! المهم حظها كان حلو فأكتفينا بالفرجه على الميس(الحكيمه) و هى بتديها الحقنه، و أستننا الضحية التاليه ..و برده جت برجليها، بس كانت مليانه فمعرفناش نلاقى أورده فكانت هاتاخدها عضل، الحقيقه الميس قالت تعالوا بس احنا برده خفنا.. فبرده اكتفنا بالفرجه. بعدين تعبنا من الفرجه و روحنا ..بس المره الجايه إن شاء الله هندى الحقنه.

.اليوم كان رائع أول مره أحس أنى دكتورة و أنى ممكن أفهم